Өткен жылы Д. Серікбев атындағы ШҚТУ ректоры бастаған бір топ делегация АҚШ-қа сапар жасап белгілі білім ордаларын аралаған еді. Олардың материалдық -техникалық базасын көріп, іске асырып жатқан жобаларымен танысты.
Оның ішінде әлемдегі ең мықты техникалық университет MIT-дің Senseable City Lab зертханасында болды. Олардың қалалық ортаның проблемаларын зерттеу үшін пайдаланатын тәсілдерін көріп, университеттің базасында сондай зертхана құру идеясы туған.

Кеше бірінші проректор Сәуле Рахметтулина, оқу және әдістемелік жұмыс жөніндегі проректор Жадыра Қоңырбаева және университеттің ғылыми қызметкерлері MIT университетінің проректоры Умберто Фугигландо, бас ғылыми қызметкер Фабио Дуарте және аға ғылыми қызметкер Симона Морамен онлайн –кездесу өткізді. Екі университет өздерінің материалдық-техникалық базаларын көрсетіп, іске асырылып жатқан жобаларын егжей –тегжейлі талқылады. Умберто мырза ШҚТУ-дың материалдық техникалық базасының мықты екеннін ерекше атап өтті.

ШҚТУ-дың мақсаты, технологиялық шешімдерді қолдана отырып, қаланың жағдайын зерттеп, оны қол жетімді, таза, қауіпсіз ету. Яғни, жүйелі көгалдандыру, көлік логистикасын жақсарту және көліктің балама түрлерін дамыту, смарт технологияларды енгізу қажеттілігін жүзеге асыратын жобалармен жұмыс істейді.

MIT-дің бас ғылыми қызметкері Фабио Дуарте экологияға қатысты мәселені шешу мақсатында өзінің жобасын қатысушылардың назарына ұсынды:

- Мен Өскеменге тіпті ертен ұшып баруға дайынмын. Экологияны зерттеуге қажетті құралдармен, яғни арнайы камераның көмегімен ауаның ластануын бақылайтын боламыз. Егер біз бірігіп бұл жобаны іске асырсақ жақсы нәтижелерге қол жеткіземіз деп ойлаймын.

Сонымен, әлемнің алдыңғы қатарлы техникалық университетімен ынтымақтастық орната отырып, ШҚТУ базасында "City space" зертханасын құру жоспарлануда. Онда қала халқының денсаулығы мен өмір сүру сапасының, қалалық ортаның жағдайымен байланысын анықтау бойынша зерттеулер жүргізілетін болады.

Екі жақ та серіктестікті тез арада бастап, бір аптаның ішінде бірігіп іске асырылатын зерттеу жұмыстарының жоспарын құруды шешті. Бұл ынтымақтастық үшін жақсы бастама болатынына сенімдіміз.