Күні кеше Өскемен қаласындағы сәулет және қала құрылысы саласындағы үздік эскиздік жобалар анықталды. Арнайы «Өскемен сәулет 2020» конкурсы ұйымдастырылып, қойылған критерийлер арқылы кіл мықтыдан кім мықты екені анықталды.
Байқау комиссиясының шешімі бойынша Д. Серікбаев атындағы ШҚТУ студенттері мен магистранттары жүлделі орындарға ие болды.
Атап айтсақ, «Үздік шағын сәулет формасы» номинациясы бойынша үшінші орынды Валерия Гаранина, Мадияр Жәнібеков жеңіп алса, екінші орынға Серік Сейітханов ие болды. Бірінші орынды Галина Ляпунова және Әсем Мұқұшева қанжығасына байлады. Үздік деп танылған жобалардың қатарында - «Интерактивті аялдама», «Сағат», «Polyana» трамвай аялдамасы, «Полюс» шағын архитектуралық нысан жобалары бар.
«Қалалық ортаның ең жақсы сәулеттік жобасы» номинациясы аясында конкурсқа қатысушылар Ертіс өзенінің жағалауындағы «Амфитеатр» кешені мен «Ғашықтар аллеясын» қайта жаңарту бойынша өз жұмыстарын ұсынды. Нәтижесінде Полина Архипова бірінші орынды, Ұлжан Нуролдина екінші орынды жеңіп алса, Александра Гаврилова үздік деп танылды. Сонымен қатар, Гребной канал аумағындағы рекреациялық-спорттық аймақтың ажарландыру бойынша өз жұмыстарын ұсынған Ирина Иванова үшінші, Анна Жукова екінші, Виктория Василенко мен Алина И-хи-де бірінші орынды еншіледі.
«Үздік қала құрылысы шешімі» номинациясы бойынша архитекторлар қала құрылысы торабын қайта жаңарту жобасын дайындау керек болды. Александра Шульгина Назарбаев даңғылы бойындағы саябақты абаттандыруды ұсынып үшінші орынды иеленді. Бурова көшесіндегі жаяу жүргіншілер жолын абаттандыру жобасын дайындап, екінші орынды Виктория Раимханова, Дайана Базанова жеңіп алды. Абай және Шәкәрім даңғылдарының шекарасында Үлбі жағалауын қайта жаңарту жұмысымен Дарья Тарасова топ жарды.
Сонымен қатар, Д.Серікбаев атындағы ШҚТУ Білім саласында «Өскемен қаласының үздік қолжетімді нысаны» атты конкурсында «Кедергісіз орта аумағы» номинациясын жеңіп алды.
Барлық жеңімпаздарды қала әкімі Жақсылық Омар дипломдармен және сертификаттармен марапаттады. ШҚТУ –дың архитектура, құрылыс және дизайн Мектебінің студенттерін, магистранттарын және түлектерін шын жүректен құттықтаймыз.
