«ЖОО-ның үздік оқытушысы – 2024» байқауының жеңімпаздары анықталды – республикалық байқау комиссиясы оқытушылық мамандықтың ең үздіктерін таңдады.
Байқау нәтижелері бойынша Д. Серікбаев атындағы ШҚТУ-дың 3 оқытушысы «ЖОО-ның үздік оқытушысы» атағын жеңіп алды. Баятанова Ляйла Болаткановна, Ескермесов Дидар Кайратович, Кеңесбеков Айдар Бақытбекұлы шын жүректен құттықтаймыз!
Жалпы, байқаудың жеңімпазы ретінде Қазақстанның 38 жоғары оқу орнынан 150 оқытушы танылды. Олардың әрқайсысы 2000 АЕК көлемінде, яғни 7 миллион теңгеден астам ақшалай сыйақы алады. Сонымен қатар, жеңімпаздарға «ЖОО-ның үздік оқытушысы» төсбелгісі табысталады.
Байқау жыл сайын оқытушы мамандығының беделін арттыру және олардың кәсіби дамуына ынталандыру мақсатында өткізіледі.
Биыл байқауға еліміздің 90 жоғары оқу орнынан 946 үміткер қатысты. Байқау барысында үміткерлердің электронды оқу ресурстарын, оқу материалдарын әзірлеуі мен жариялауы, отандық және халықаралық журналдардағы ғылыми мақалалары, өнертабысқа патенттері және басқа да көрсеткіштері бағаланды. Сондай-ақ үміткерлердің оқыту сапасы, бакалавриат, магистратура және докторантура деңгейінде мамандар даярлаудағы еңбегі ескерілді.
Айта кетейік, байқау ҚР ҒЖБМ ақпараттық жүйесі базасында өткізілді, бұл оның барлық кезеңдерінің ашықтығын қамтамасыз етті. «ЖОО-ның үздік оқытушысы – 2024» байқауына қатысу үшін өтінімдер мен құжаттар электронды форматта қабылданды. Комиссия құрамына үкіметтік емес ұйымдардың өкілдері, жоғары оқу орындары қауымдастығының мүшелері және жоғары білім саласындағы сарапшылар кірді.
Әріптестерімізге Жаңа жылда табыс тілейміз!
