Ulab – Қазақстанның түкпір-түкпірінен жиналған талантты жастарға медиажобаларды жүзеге асыру үшін қажетті білім мен дағдыларды үйрететін бірегей Медиамектеп. Жоба сапалы контент жасауға, креативті ойлауға және заманауи технологияларды қолдануға бағытталған.
Медиамектептің негізін қалаушылар – ҚР Мәжілісі жанындағы Қоғамдық палата мүшесі Айбек Күмісбеков пен бұрынғы ақпарат және қоғамдық даму вице-министрі Александр Данилов. Жобаға 18-25 жас аралығындағы жастар қатысады, олар 3 ай бойы офлайн және онлайн форматтарда білім алады.
ШҚТУ студенттері үшін ҚР-ның ең ықпалды жастарының басын қосқан, атап айтқанда 817 өтінім ішінен іріктелген 25 қатысушының қатарына ену үлкен жетістік болды.
ULab 3.0 бағдарламасының құрылымы
Бағдарлама 3 офлайн-интенсив пен бірнеше онлайн дәрістерден тұрды. Әр кезеңде қатысушылар медиа саласының түрлі аспектілерін меңгеріп, тәжірибелік тапсырмаларды орындады.
1-модуль – Қостанай қаласы
12-13 қазанда Ахмет Байтұрсынұлы атындағы Қостанай өңірлік университетінде өткен алғашқы офлайн-интенсивте қатысушылар әлеуметтік желілерге арналған контент жасауды үйренді. Спикерлер қатарында Әли-Әскер Байғожин, Сырым Әуезхан, Артур Нығметов, Яков Федров, Еркін Міржақыпов, Әлия Әшім және Нәркес Балғожаева сынды медиа саласының сарапшылары болды.
2-модуль – Мәтінмен және видеомен жұмыс
Бұл модуль онлайн форматта өтті. Zoom платформасында сабақтар жүргізілді. Қатысушылар Бақыткүл Шеркенова, Дания Арманқызы, Даниал Хэтчер, Арман Скайден және Динара Болат сынды спикерлерден білім алды.
3-модуль – Бурабай қаласы
9-10 қарашада Бурабайда өткен екінші офлайн-интенсив барысында қатысушылар көпшілік алдында сөйлеу, әлеуметтік медиа стратегияларын әзірлеу және трендтерді пайдалану әдістерін меңгерді. Спикерлер қатарында Санди Сұлтан, Болат Бұхарбай және Сырым Итқұлов болды.
Сонымен қатар Zoom платформасында онлайн сабақтар өтті. Сабақтар 2 күн бойы, 6 сағаттан жүргізілді.
4-модуль – Продюсерлік ету және SMM
Бұл модуль де онлайн форматта өтті. Спикерлер Гүлмира Ескендірова, Әйгерім Жуконева, Батырхан Қайратов, Берік Әсетұлы, Зарина Қайратқызы және Дамир Байшолақов болды.
5-модуль – Алматы қаласы
Ulab Almaty Grand Final– Қатысушылар өз командаларымен дайындаған медиажобаларын қорғап, жүлделі орындар мен номинацияларды иеленді. Соның ішінде үздіктерден оза шыққан Д.Серікбаев атындағы Шығыс Қазақстан техникалық университетінің Жер туралы ғылымдар мектебінің 2-курс студенттері Исаба Диас пен Әлмұрат Тағаймұрат өз командаларымен 2-орынды иеленді. Сондай-ақ, 4-курс студенті Слам Ақерке өз командасымен 3-орын алды.
Медиамектепті аяқтағаны үшін қатысушылар ҚР Мәжілісі жанындағы Қоғамдық палата мүшесі Айбек Күмісбеков пен бұрынғы ақпарат және қоғамдық даму вице-министрі Александр Даниловтан сертификат алды.
Бұл жоба студенттеріміз үшін үлкен тәжірибе болды. Олар алған білімдерін өмірлік жолдарында қолданады деген сенімдеміз. Біз өз студенттерімізбен мақтанамыз!
