1 сәуірде «Пайдалы демалыс» дайындық курсының үшінші маусымының жабылу салтанаты өтті. Аталмыш шара мектеп директорлары, ата-аналар және ұстаздардың қатысуымен барлық қатысушыларға, сондай-ақ  топ тәлімгерлеріне салтанатты түрде курс аяқтағаны туралы куәлік табыстауымен қорытындыланды. Күн сайын оқушылар 4-6 сағатты қамтитын сабақтарға қатысты. ҰБТ пәндері бойынша дайындық сабақтарынан басқа, түлектер мәдени бағдарламаларға да белсене қатысты: «Менімен биле» дискотекасы, «PROясним» ойын-квесті,  «Наурыз-Думан» мерекесі, этно-саябақ, "Крокодил" интеллектуалды ойыны. Курстардың жабылу салтанатында  топтардың арасында өткізілген «Біз үздікпіз» бейнебаян байқауының қорытындысы жарияланды. Байқау нәтижесі бойынша 9 топтың старосталары келесі номинациялар бойынша марапатталды: Ең үздік спорттық ролик, Ең көңілді ролик, Ең үздік операторлық жұмыс, Ең креативті ролик, Үздік режиссура және Үздік монтаж.

Жеке пәндер бойынша оқу үрдісінде айрықша көзге түскен оқушыларға сертификаттар табысталды. Мадақтау қағаздары және сертификаттар табыстау салтанатынан кейін іс-шара қатысушылары мен топ кураторлары әзірлеген музыкалық қойылымдармен жалғасты.

Мерекелік іс-шара барысында қатысушылар ұйымдастырушыларға алғыс сөздерін жеткізді. Оқушыларға аса зор қамқорлық таныта білген, ұйымдастырушылық, шығармашылық жұмыстарды лайықты атқара білген топ тәлімгерлердің жұмысы ерекше атап өтерлік.

Аталмыш іс-шарадан қуат алып, жаңа білімімен қаруланған оқушылар одан әрі  Ұлттық бірыңғай тестілеуге дайындау үшін өз білім ордаларына оралды. Талапкерлердің пайымдауынша, жоба нәтижесінде олар пайдалы тәжірибемен қатар жаңа достарға да ие болды.