Д.Серікбаев ат. ШҚМТУ-да Ұлы Жеңістің 73 жылдығына, сондай-ақ Отан қорғаушылары күніне орай салтанатты жиын өтті.
Іш-шара көк байрағымызды енгізу салтанатынан бастау алды. Университет ректоры Жасұлан Шаймарданов ардагерлер, университет студенттері мен қызметкерлері алдында құттықтау сөз сөйледі.
ШҚМТУ-дың шығармашылық ұжымдары соғыс жылдарында айтылған əндерді орындап тыңдармандарға қаралы кезді еске салды. Осылайша, "Ардагерлер" əнін талантты əнші Шалқар Мукамгалиевпен ілесе көрермендер де шырқады.
Шара барысында жиналған қауым соғыс жылдары жайында əзірленген арнайы слайдтарды тамашалап, көздеріне жас алды. Бұл - олардың халқымызға бейбітшілік пен келісім заманын сыйлағаны үшін майдан қайраткерлеріне айтқан алғысы.
Аға буын мен жас ұрпақ есімдері халық жадында мəңгі қалатын Отан соғысы батырларын еске алу үшін бір минут үнсіздік жариялады.
- Осы іспеттес іс-шараларды өткізуді жылдан жылға үзбей жалғастырып келе жатқан ұйымдастырушыларға алғысымызды білдіреміз, бізге əңгіме-дүкен құруға, жастық шақты еске салуға жəне сүйікті əндерімізді тыңдап, шырқауға мүмкіндік бересіздер, - деп ардагерлеріміз айтып өтті.
Сондай-ақ Бастауыш кəсіподақтық ұйым өкілдері университетімізде қызмет ететін ер адамдарға арнайы сертификаттар табыстады.
Д.Серікбаев ат. ШҚМТУ баспасөз қызметі
