"KKO.KZ" веб-сайты ұйымдастырған ЖОО студенттері арасында өткізілген "Орыс тілі" пәні бойынша республикалық онлайн-олимпиадада университетіміздің студенттері ерекше табысқа жетіп, I дәрежелі дипломмен марапатталды. Аталған шара еліміздегі жоғары оқу орындарының студенттері арасында орыс тіліндегі білім мен сауаттылықты арттыру мақсатында ұйымдастырылды. Олимпиадаға қатысқан студенттер өздерінің теориялық білімдерін, практикалық дағдыларын және тілдік құзыреттіліктерін жоғары деңгейде көрсетіп, жеңіске жетті.
24-БЖК-1 тобының студенттері Нұрпейісов Алтай Елтайұлы, Тұрысбеков Әнуар Тоқтарұлы, Көкенай Ақтілек Мұхтарұлы, 24-БЭК-1 тобының студенті Айткеш Данял Болатбекұлы, 24-ГТК-1 тобының студенттері Лұқбан Аслан Мейрамғалиұлы және Қанағат Наурызбек өздерінің білімдерін саралауда сынға түсіп олимпиадада бақтарын сынады. Әрқайсысы өз саласында озық білімдері мен біліктіліктерін көрсетіп, олимпиаданың барлық кезеңдерінен сүрінбей өтіп, жоғары ұпай жинады.
Студенттеріміздің жетістігі олардың қажырлы еңбегінің және орыс тілін терең меңгергендіктерінің айқын дәлелі болып табылады. Сонымен қатар, тілдік құзыреттілік орталығының аға оқытушысы, филология ғылымдарының кандидаты С.К. Ережепова жетекшілік еткен топтың жеңісіне қосқан үлесі мол. Шара барысында жетекшісі С.К. Ережеповаға да университет атынан Алғыс хат табыс етілді. Бұл мақтау мен құрмет оның білім беру саласындағы зор еңбегі мен жауапкершілігінің нәтижесі екені сөзсіз.
Бұл жеңіс университетіміздің тілдік білім беру саласындағы жетістіктерін айшықтай түсіп, болашақта да жоғары нәтижелерге жетуге деген жігер мен ынта береді. Орыс тілі пәнінен өткен олимпиадада университетіміздің студенттерінің жеңісі тек олардың жеке жетістіктері ғана емес, сонымен бірге оқу орнының білім сапасының да жоғары деңгейде екендігінің көрсеткіші.
Аталған олимпиадада жеңіске жеткен студенттер мен олардың жетекшісіне зор алғысымызды білдіреміз.
