Д. Серікбаев атындағы ШҚТУ-дың Бизнес-мектебі «Қазақстан тарихы және әлеуметтік-саяси пәндер» кафедрасының оқытушылары Жошы Ұлысының 800 жылдығын мерекелеу аясында қазақ мемлекеттілігінің тарихындағы Жошы Ұлысының рөлі мен маңызын талқылауға арналған дөңгелек үстел ұйымдастырып өткізді.
Іс-шара Жошы Ұлысының осы маңызды тарихи кезеңін зерттеуге қызығушылық танытқан оқытушыларды, студенттерді және сарапшыларды біріктірді.
Дөңгелек үстелдің қатысушылары: модератор – тарих ғылымдарының кандидаты, Калиева К.С.; спикерлер – тарих ғылымдарының кандидаты, қауымдастырылған профессор Айдарбаева Р.К., кафедраның аға оқытушысы Джаксылыков А.Ф., тарих ғылымдарының кандидаты Калиева К.С., тарих магистрі Урюстюмова А.И.; сондай-ақ 23-ССК-1, 23-ЭЛК-1 топтарының студенттері және «Қазақстан тарихы және әлеуметтік-саяси пәндер» кафедрасының оқытушылары.
Дөңгелек үстел барысында спикерлер мына тақырыптар бойынша баяндамалар жасады: Жошы Ұлысын зерттеудің дереккөздері; мемлекеттік құрылымы мен заңнамасы; Жошы Ұлысының этникалық құрамы; Алтын Орданың халықаралық қатынастар жүйесіндегі рөлі мен маңызы.
Бұл дөңгелек үстел Жошы Ұлысының тарихи мұрасына байланысты өзекті мәселелерді талқылауға арналған маңызды алаңға айналды. Қатысушылар бұл кезеңді зерттеу қазақ мемлекеттілігінің тамыры туралы білімді тереңдетуге және болашақ зерттеулер үшін жаңа мүмкіндіктерді ашуға ықпал ететінін атап өтті.
Осындай іс-шаралар тарихқа деген қызығушылықты арттырып қана қоймай, студенттердің аналитикалық ойлау қабілеті мен зерттеу дағдыларын дамытуға көмектеседі. ШҚТУ Қазақстанның тарихи мұрасын сақтау және насихаттау бағытындағы белсенді жұмыстарын жалғастырып, жастардың ел тарихындағы маңызды беттерге назарын аудартуда.
